" حميها حراميها "

أول ما قرأت الخبر بتاع نقيب الشرطة محمد أنور

جاويش اللي كون عصابة للسرقة بالإكراه إفتكرت جملة محمود ياسين

الخالدة في فيلم الصعود للهاوية "هي دي مصر يا عبلة" وأيضاً تذكرت

المثل الشعبي الذي يقول "حاميها حراميها"، النقيب الحرامي صعد وصعدت

معه الشرطة المصرية للهاوية وكون عصابة مع ضابط شرطة مفصول من

الخدمة لسوء سلوكه ومع مسجل خطر وقاموا بعدة سرقات، الضحية الأولى

لعصابة الصعود للهاوية هي إمرأة يابانية إسمها جانكو يانا ماكاتا

عمرها 47 سنة ومخطوبة لرجل مصري كانت نايمة في أمان الله في شقتها

بالهرم وقبل الفجر بشوية صحيت على صوت خبط ورزع على باب شقتها

وفتحت الباب لتجد بواب العمارة واقف بيترعش من البرد وإنتو عارفين

برد شهر يوليو صعب خالص وقدامه تلات أشخاص يرتدون ملابس الشرطة

واخبروا اليابانية جانكو بأنهم ضباط أمن دولة وإن عندهم إخبارية

بإنها على صلة بتنظيم القاعدة (هي القاعدة فتحت فرع في اليابان)

وإنها بتشتغل مع المنظمات الإرهابية، الولية اليابانية ما فهمتش

منهم حاجة وقالت لهم إنها هتطلب خطيبها في التليفون وبالفعل جاء

خطيبها ونظراً لأنه مصري أباً عن جد وأماً عن ست فقد إترعش من البرد

أول ما عرف إنهم قمل دولة وإنتو عارفين برد شهر يوليو صعب قوي

الخلاصة الراجل خاف منهم وأقنع خطيبته بأن تتركهم يفتشون الشقة، بعد

ما النقيب محمد أنور جاويش والإتنين اللي معاه ما أشطوا الشقة وخدو

منها مبلغ مالي كبير وخدوا كمان موبايل جانكو وموبايل خطيبها وخدوا

كمان الإتنين لابتوب بتوع جانكو وهوبا كانو في الخليعة وأخبروا

اليابانية بأن تنزل مع خطيبها فور أن ترتدي ملابسها وأنهم

بإنتظارهم تحت في سيارة الشرطة، بس خلاص اكيد إستنتجتم إن جانكو

وخطيبها نزلو مالقوش لا عربية ولا أي حاجة خالص وده اللي حصل فعلاً،

بعد أربع تيام عصابة الباشا نقيب الشرطة عملت خبطة تانية وضحيتهم

المرة دي كان رجل أعمال مصري مقيم في الإمارات وكان يقضي أجازته في

مصر وبنفس الطريقة سرقوا منه نصف كيلو ذهب وعشرون ألف درهم وإتنين

موبايل، مش عارف إيه غيتهم في الموبايلات، الشرطة طبعاً لجأت لشركة

المحمول وطلبت منها تتبع الهواتف المسروقة على شبكتها وبالفعل إكتشفت

ان الهاتف بتاع اليابانية تم تشغيل خط آخر عليه وبتتبع مكالمات الخط

تبين أنه مملوك لملازم شرطة بقسم النزهة، الشرطة قفشت الملازم وسألته

من أين لك هذا؟ إتضح ان الملازم مالوش أي علاقة بالسرقات وإنه إنسان

شريف جداُ وإن الحكاية وما فيها انه من يومين لمح موززة قاعدة في

عربية قدام فندق السلام بجسر السويس وبعد ما قبض عليها وظبط معها

ومع رفيقها كمية من الهيروين فقام الملازم اخذ منها الموبايل وضرب

عليه عواف الله يعافيكم إقعدوا بالعافية، الحكاية كده اتعقدت في وش

المباحث العامة فراحو يستجوبوا البت المزة اللي كان معاها الموبايل

اعترفت لهم إنها خدت الموبايل من جوزها المسجل خطر واللي هو مشترك مع

نقيب شرطة اسمه محمد أنور جاويش وهو رئيس قسم التحقيقات بقسم بولاق

الدكرور ومع ظابط تاني مفصول في عصابة وانهم بيسرقو السياح الأجانب،

قبضوا على نقيب الشرطة والنائب العام هبدوا أربعة إستمرار ولازال

البحث جارياً عن شريكاه الظابط المفصول والمسجل خطر، كل اللي فات ده

مش مهم تعرفو ليه عشان النقيب ده طلع متجوز بنت مساعد وزير

الداخلية يعني بمجرد ما هيبدأ في ممارسة ضغوطه ووساطاته هيتم إقناع

الشريكان بأن يعترفا بأن النقيب لا صلة له بحوادث السرقة وأتحداكم إن

حارسا العقاران والضحايا اللي إتعرفو على النقيب محمد أنور جاويش

هينكروا بعد شهرين تلاتة قدام المحكمة انهم شافوه وفي الآخر اللي هيلبس

الليلة كلها هو الظابط المفصول والمسجل خطر وبكرة أفكركم بأني كنت

أول واحد في مصر يستنتج سيناريو براءة زوج بنت مساعد وزير

الداخلية، وأرجوكم أن تتذكرو هذا الإسم جيداً محمد أنور جاويش لأنه

من المحتمل جداً أن يكون وزير داخلية مصر بعد خمستاشر سنة لو ورث جمال

مبارك مصر والشعب المصري وحكم مصر...

أه ماهو ده اللي هيحصل .... ما تستغربوش أصل أصل والده عمل حكايه

انتخبات الرياسة اللي فاتت عشان كده ،، عشان لما يرحل إلي دار

الفناء يبقي الشعب هو اللي أختار علاء للرياسة ....

عشان لو حد قال إن زمن الوراثه إنتهي ،، وإن الحكم مش وراثه يبقي

أنتوا اللي أختارتوه ... هي ده مصر يا عبله .. عارفين المشكلة إللي

أكبر من كده ... أن في واحد من كبار البلد وممكن يكون هو البلد

نفسها ،،، كل خميس بيعمل حفلات في قصر محمد علي ... حفلات أخر مسخره

.... وده كله منين ؟؟؟؟

من دمنا أحنا ... أه كليوم الدنيا تغلي ... البنزين يغلي ....

ولما يغلي البنزين يظهر جشع

السواقين .... بس هو هيعمل ايه ؟؟؟ وتصب في الاخر علي دماغنا احنا ..

والأكل يغلي .... وتصب في الأخر علي دماغنا إحنا ...

هي اللي الدوله عماله تلمها من دم الغلابه بتروح فين ؟؟؟؟

ياتري بتروح لأخوان المجاهدين في غزه والعراق وفلسطين زي ما بيقولوا ؟؟؟؟

ولا بتروح في الحفلات في قصر ومحمد علي وغيره من الحفلات ؟؟؟

مش قلتلكم إن حميها حراميها.....